* اللحم رستو *

من طرف ام دهب و مصطفى الإثنين مايو 18, 2015 8:34 am

* اللحم رستو *
******

المقادير
******
# عرق لحمه من القشره بس يكون العرق العريض
( لان العرق الرفيع مش بيستوى بسرعه ) واطلبيه كدا من الجزار

# كميه من فصوص الثوم ولو كان الفص كبير قسميه على اتنين

# معلقتين حبهان مطحون + فلفل اسود

# خيط قطنى عريض علشان نلف بيه اللحمه ( الدوباره )

# معلقتين سمن للتحمير

الطريقه
*****
# اول حاجه اغسلى اللحم كويس وبعدين حطى اللحم قدامك على الرخامه ابدئى بالسكين
افتحى فتحات عميقه فى الوش اللى فوق بس متوصلش للوش اللى تحت وحطى قليل من الحبهان فى الفتحه دى وبعدين دخلى فيها قطعه الثوم

# كررى الطريقه دى على كامل الجهه دى وتكون على مسافات متباعدة لحد لما تخلصى وبعدين اقلبى الوش التانى وكررى نفس الطريقه تانى

# كدة خلصنا كل العرق هاتى الدوباره ولفيها كويس على العرق داير ما يدور وشدى عليها وانتى بتلفى علشان يتماسك كويس

# فى حله مقاس مناسب لطول العرق حطى معلقتين سمن ولما يقدحوا رشى كل العرق بفلفل اسود خفيف من الاتجاهين وبعدين حطيه يتحمر فى السمن من الجانبين

# بعد التحمير غطى العرق بالماء الكافى للسواء مع رشه ملح صغيره جدا جدا علشان الماء هينشف ويقصر ويتبقى شويه صوص فقط فيكون الملح مناسب ومش حادق

# ارفعى العرق بالراحه فى سرفيس واتركيه يبرد تماما وبعد كدا فكى الخيط وقطعيه ترنشات زى مانتى شايفه وبعدين شيليه زى ما هو كدا و حطيه فى سرفيس التقديم بميل وسخنى الصوص ورشيه عليه وجمليه باى اضافات عايزها