المقرمشات المملحة بحبة البركة

من طرف توتى بدر الخميس سبتمبر 25, 2014 3:35 pm

المقرمشات المملحة بحبة البركة
=====

[ندعوك للتسجيل في المنتدى أو التعريف بنفسك لمعاينة هذا الرابط]

المقادير:
1/4 كيلو دقيق
100 جم سمنه(حوالي 3 معالق كبار)
1/2 كوب جبنه رومي مبشوره
1 معلقه صلصه طماطم جاهزه
1 معلقه صغيره سكر
1/2 معلقه صغيره ملح
1/2 معلقه توم بودر(اختياري)
ماء دافئ للعجن
مش بنحتاج في الوصفه دي ولا بودر ولاخميره
وطبعا هنحتاج سائل تلميع الوجه(لبن وبيضه وشويه فلفل)
وحبه البركه وجبنه رومي مبشوره
الطريقه:
نخلط الدقيق مع السكر والملح والتوم البودره
ونضيف عليهم الجبنه الرومي المبشوره والصلصه والسمنه
(السمنه تكون بدرجه حراره المطبخ)
نخلط كل المكونات مع بعض ونبسهم زي ما بنعمل الكحك
لحد ما يبقي الخليط زي حبات الرمل
هنضيف الماء الدافئ تدريجيا ونعجن
حتي تتكون عجينه طرية وملساء
سبب لون العجينه الحلو دا بسبب الصلصه
هنسيبها ترتاح لمدة نصف ساعة
ونقطعها كور وكل كره هنفردها بسمك اقل من نصف سم
وبحجم رغيف العيش
هنقطعه اربع مثلثات ونرصه في صاج مدهون زيت خفيف
وندهن الوجه بخليط اللبن والبيض
ونرش عليه حبه البركه والجبنه المبشوره
وندخله الفرن علي 180 درجه فى الرف الاوسط من الفرن حتى يستوى وهيكون مقرمش بعد مايهدى من طلوعه من الفرن.