* طريقة عمل العيش الشمسى *

من طرف **هدى من الله** الأحد مايو 01, 2016 11:52 pm

طريقة عمل العيش الشمسي

=====

[ندعوك للتسجيل في المنتدى أو التعريف بنفسك لمعاينة هذا الرابط]

الخطوة الاولي :هنجيب رغيف عيش فينو من مخبز قريب بس يكون متخمر ونحطه في وعاء ونضيف عليه كمية صغيره حوالي معلقه متوسطة خميرة فورية(البيرة)
ونكون مجهزين كمية كبيره من الدقيق وناخد منهم شويه نعجنهم لمدة ربع ساعه لحد ما يتماسكو وبعدين نغطي العجينه كويس ونسيبها تتخمر لحد الصبح
وباقي الدقيق نشيله لحد الصبح عشان نكمل بيه العجين

الخطوة التانية: نقوم الصبح نحط شوية ميه علي النار ونحط فيهم شويه ملح مش كتير ونسيبهم لحد ما الميه تغلي
نروح نجيب وعاء ونحط فيه شوية دقيق ونروح حاطين المية المغلية عليهم ونقلبهم كويس جدا ونسيبهم عشر دقايق لحد ما يبردو
وبعدين نحط عليهم كمية الدقيق الباقيه ونفضل نعجن فيها لحد ما يتماسكو كويس حوالي نص ساعه
وبعدين نجيب الخميره اللي عجناها قبلها بيوم ونحطها عليها ونعجن لحد مايتماسكو ونحط ميه لو احتاجوا
المهم العجينه متبقاش ناشفه تكون طريه وبعد ما نخلص عجين
نجيب حاجه مسطحه خشبه عريضه كرتون متماسك ونرش عليه الرده طبعا انتو عارفين الردة اللي بنطلعها من القمح
وبعدين نقطع العجين كور متوسطه ونسيبه خمس دقايق وبعدين ندبه او نفرده شويه صغيرين ونحطه في الشمس لحد ما يخمر
ونروح نقلبه علي الناحيه التانيه عشان ميتفتحش ويبوظ نسيبه عشر دقايق ونعدله ونسيبه شويه يكمل تخميره
وبعدين نجيب اي حاجه نفتح الجوانب بتاعته موس مثلا بس يكون نضيف وجديد او عوده من البوص بتاعنا
‏‎
طبعا نكون مجهزين الفرن ويكون سخن ولو عايزين نعرف هو سخن ولا لأ نرش فيها شوية ردة لو اتحرقت مش بسرعه تبقي كويسه
ونرص العيش ونستناه لحد ما يستوي ونطلعه وبالهنا والشفا
(المقادير بتختلف من حيث الكمية المطلوبه طبعا)

صافية

‪طريقة أخرى

اسهل واسرع طريقه لعمل العيش الشمسى
المكونات:-
5 أكواب دقيق عادى+2 كوب ونصف ماء دافىء للعجين +ملعقة كبيرة خميرة فورية او خميره من المخبز+ ملح +ردة (نخالة القمح )

تحتاجين إلى أشياء مسطحة لتقطيع الخبز عليها ويمكنك إستعمال أطباق مسطحة تماما أو شرائح مسطحة أو ورق مقوى بحيث يمكنك حمله , قصيه مربعات كبيرة .

طريقه التحضير :-

ينخل الدقيق , وتضبط ملح الماء وبعدين تضاف الخميرة للدقيق ويعجن واذا كانت العجينه لينه لذلك
يمكنك وضع قليل من الماء إذا أحتاج الامر وبعد ذلك يغطى العجين ويترك فى مكان دافىء , حتى يخمر ويتضاعف حجمه وبعد ما يخمر العجين رشى الاطباق او الادوار أو الكرتون بالردة بحيث تغطيها تماما
.وضعى بجانبك طيق به كميه من الدقيق لغمس قطعة العجينه فيها و يؤخذ قطعة من العجين بحجم برتقاله كبيرة ,

وتغمس فى الدقيق ونحاول نسويتها لتكون على شكل كرة ثم توضع على الطبق المرشوش بحيث يكون الوجه الذى به الدقيق لأعلى و كررى العمليه حتى إنتهاء جميع الكمية , وأتركيه قليلا ليرتاح
ثم أبدأى دبى من أول رغيف تم تقطيعه ضعى قليل من الدقيق على سطح الرغيف وأمسحى به السطح
(حتى لا يلتصق العجين باليد أثناء الدب)

وبعد ذلك ضعيه فى مكان مشمس ليختمر مرة أخرى ويتضاعف إرتفاع الرغيف حسب قوة حرارة الشمس و عندما يرتفع العيش قومى بإدخاله إلى الظل , ثم دعيه قليلا ليهدأ من سخونه الشمس .
قومى بقلب الرغيف على يدك وإرجاعه مكانه مرة أخرى بحيث يكون القاعدة التى بها الردة لأعلى
طريقة ذلك (أمسكى الطبق بيدك ثم ضعى اليد الاخرى على سطح الرغيف وقومى بقلبه كما سبق )
وبعدين قومى بمسح قعر الرغيف من الردة الزائدة يمكنك إستعمال يدك ولكن بخفة حتى لا يهبط الرغيف , أو يمكنك إستعمال سكين حاد نوعا وخفيف , أوأى شىء يشبه ذلك و تشق القشرة الخارجية للرغيف من الجوانب بشكل دائرى
ويخبز فى فرن محمى مسبقا فى درجة حرارة متوسطة ( ممكن فرن عاديه او فرن بوتاجاز او فرن انبوبه بس انا دائما بفضله فى الفرن العاديه بيكون طعمه احلى ولذيذ)
طريق وضعه فى الفرن :
أحملى الطبق بيدك ثم اقلبى الرغيف على يدك أوطبق اخر أو شىء مسطح ثم ضعيه فى الفرن بحيث تكون القاعدة التى بها الردة لأسفل

علامة النضج او الاستواء:أنك إذا نقرت على قعر الرغيف يصدر رنه , ويكون مشدود وليس به إرتخاء يخرج ويرص بجوار بعضه على قطعة قماش ليبرد

ملاحظات :

1* إذا كان فرنك ليس به شعلة من أعلى يمكنك بالطبع قلب الرغيف بعد نضجه ليأخذ الوجه اللون الذهبى .
2* إذا كان ليس لديك شمس يمكنك وضع الارغفة فى مكان دافىء حتى يرتفع العيش .
3* أنتهبى من الردة على الارض أثناء العمل فيصعب تنظيفها لذلك يجب ن يكون سطح العمل واسع .
4* أنتبهى من خدش الرغيف أثناء مسح الردة حتى لا يهبط الرغيف .
5* يجب رش الردة جيدا على الاطباق حتى لا يلتصق العجين بالطبق فيؤدى إلى هبوطه
عند قلبه .
6*يجب الا تترك الارغفه فى الشمس مدة أطول من الازم لترتفع جدا (يخرج العجين من الجوانب )
حتى لا يؤدى ذلك إلى هبوطها بمجرد قلبها للمسح .
7* يمكنك تسخين الخبز عادى فى الفرن أو على البخار
8* يحفظ فى الثلاجة , خصوصا فى الجو الحار