* تكات المحشى *

من طرف ام دهب و مصطفى الأحد ديسمبر 27, 2015 9:59 pm

* تكات المحشى *
====

[ندعوك للتسجيل في المنتدى أو التعريف بنفسك لمعاينة هذا الرابط]

1- الكرنب مش بسلقه بجيبه قبلها بيومين واحطه فى الفريزر اقطعيه نصين لو الفريزر صغير
2 - هتطلعيه قبلها بساعتين يفك هتلاقيه مستوى ومسكر ومش مهرى وهيتقطع معاكى بمنتهى السهوله
3- روح المحشى هو البصل بتعملى بصل كتير لو هتعمليه مسبك يبقى دهبى بس مش محمر علشان ميبقاش مزز ولو نى فى نى خليه متقطع صغير جدا
4- طريقتى فى غسل الخضره مش بعملها واحده واحده لا بقطعها من غير غسيل فى حله مليانه ميه واسبيها عشر دقايق بتلاقيها طلعت فوق الوش وكل التراب والرمل والبايظ سقط فى قاع الحله بتاخدى اللى فوق الوش بس
5- بتحطى على الصلصه الملح والشطه و الخضره اخر حاجه بنحطها علشان متدبلش فى الصلصه وبضيف 2 ملعقة زيت على الخلطه قبل ما احشى علشان يلمع ويبقى طعمه جميل
6- بترصيه طبعا دى كلنا عارفينها والشوربه يدوب تبقى باينه من بين الصوابع ونرج الصنيه بالراحه خالص والشوربه مش بندلقها على الوش لا بتحطيها من على جنب بالراحه
7- الكرنب بقطع على الوش شرايح فلفل رومى وبصل بتديله ريحه فظيعه
8- بعد ما بخلص بغطى وش الصنيه بورقه كرنب خضرا علشان الوش يستوى زى اللى تحت بالظبط كده خلص الكرنب نحطه على نار عاليه لحد ما تختفى الشوربه وبعدين نهدى النار خالص
9- ده ورق العنب تكته تعصرى ليمونه على الشوربه قبل ما تحطيها عليه
10- محشى البتنجان بنغز البتنجانه فى بطنها بطرف السكينه قبل ما احشيها علشان ميبقاش الرز اللى فيها من فوق مستوى ومن جوه نى
وبعد ما يستوى تروحى قلبا الحله او الصنيه على وشها خمس دقايق وخلى بالك احسن تقع الحركه دى مبتخليش ولا صوباع يلزق فى القاع لانه بيتبخر ويفك من الحله

[ندعوك للتسجيل في المنتدى أو التعريف بنفسك لمعاينة هذا الرابط]
منقول