احتياجاتى فى الحج والعمرة

من طرف هنا سيد الجمعة يناير 15, 2016 11:20 pm

احتياجاتى فى الحج والعمرة
====
مليون مبروك لكل من نوى او قدم على العمرة وربنا يتقبل ان شاء الله
** اول حاجة تشترى أجندة من المكتبة وتكتبى كل احتياجاتك
علشان ما تنسيش حاجة
انا بكتب المأكولات ( بتكون بسيطة مش كتير )
والادوات اللى محتاجاها
والملابس الحريمى
والملابس الرجالى
تليفونات الاهل
توقيت الصلوات
الفلوس ( المصرى والريالات والدولارات ) كى اعرف صرفت ايه
وبشوف اسماء الفنادق على النت واتعرف على مكانها واتجاهها بالنسبة للحرم
وبشوف فيديوهات وأقرأ مواضيع عن العمرة

****
** خدى شنطتين سفر لو كنتى انتى وزوجك أفضل من شنطة واحدة
وحطى حاجتك فى شنطة وحاجته فى شنطة أفضل

*****
** من أجندتى التى اجددها كل عمرة
احتياجات الحج والعمرة ( انا بكتب لفردين )
# اولا
- ملاية (حسب درجة الفندق )انا اتعودت اخد ملاية صغيرة بحب افرشها من اول المخدة حتى فى فنادق الخمس نجوم
من ايام الحج .. ممكن تستغنى عنها الملايات نظيفة و كتيرة
- 2 فوطة
- 2 مقص صغير من المقفول ( من عند بتاع الخردوات ) علشان لو عملتى اكثر من عمرة لانه احيانا بيضيع
(وحطى المقص والسكين وادوات الحلاقة والملقاط واى اله حادة
فى شنطة الهدوم فى الهاند باج ولا تطلعى بها على الطيارة ممنوع)
- 2 طبق (صاج او المنيوم ينفع للتسخين )
- 2 ملعقة كبيرة
- ملعقة شاى
- غلاى شاى ( فيه فنادق فيها غلاى او توجاز كهرباء صغير وفنادق مفيهاش )
- معجون اسنان (عبوة صغيرة ) و 2 فرشة اسنان
- كنكة صغيرة
- زجاجة ماء
- بكرة ورق تواليت و بواكى مناديل ورق ( موجود بالفنادق كتير بس باخد كمية بسيطة)
- صابونة ديتول صغيرة للحمام ,, كام كيس شامبو ,, ليفة حموم ( بقطع حتة صغيرة من الليفة)..
- كيس كيلو مسحوق غسيل ( بغسل به الملابس والالاطباق والاكواب والملاعق بدل اى صابون سايل ممكن يبهدل الدنيا )
- سلك المواعين ابو جنيه بدل ليفة مواعين
- علبة كبريت للظروف
- مشط وكريم للشعر .. عبوة صغيرة ( بلاش زيوت علشان مرة اخدت وبهدلى الحاجة لما اتفتح )
- دبابيس مشبك كبيرة وصغيرة ودبابيس للطرح
- قمح .. انا باخد معى نص كيلو لحمام مكة ونص كيلو لحمام المدينة ( كل كيس لوحده )
- اقلام جاف واقلام فلوماستر اسود وكوريكتر ,, وتكتبى الاسما على الشنط والتليفون
_ سلوتيب الصغير والكبير
- حبل ( بينفع)
_ اكياس بلاستيك( عدد قليل بتنفع )
- مشمع قطعة صغيرة بناكل عليها
- التليفون والشاحن
- النظارات
- خيط اسود وابيض وابرة خياطة
- معجون ازالة الشعر للمنطقة الحساسة وخصوصا لو رحتى المدينة الاول (علشان لما تحرمى من هناك)
- ماكينة ازالة الشعر لو مشعرة
- ادوية ( لانها هناك غالية )لاى مرض مزمن وللصداع والمغص والبرد ومرهم مضاد حيوى للتسلخاتوغيره
- 2 شبشب بلاستيك واحد حريمى وواحد رجالى
- ادوات الحلاقة وامواس او المكنة اللى بتترمى حسب ما بيستعمل الزوج
- زبدة كاكاو و كريم ملطف
كل العبوات تكون صغيرة
# ثانيا
الملابس الحريمى
- 2 عباية خروج والطرح
- 2 اسدال
- 3 غيار داخلى اندروير ,, شورت ( انا بلبس هناك اندروير وفوقه شورت بيمنع التسلخات فى الحر)
- 2 بنطلون قطن ,, 2 قميص داخلى ( كمبلزون)
- جلبية بيت ,, ممكن تشترى من هناك للتغيير ( رخيصة )
- شبشب جلد او حذاء جلد مريح .. انا بسافر بالصابو لانه مريح
- 2 شراب حتى تحت الشبشب البلاستيك بيحمى من تسلخات الرجل ومن رخام الحرم

*****
# ثالثا
الملابس الرجالى
- 2 بشكير ,, 2 حرام
- 3 غيار داخلى فانلة واندروير لو كان الشورت يبقى أفضل
- 2 بنطلون ابيض
- جلبية بيضاء
- تى شيرت وبنطلون ( حسب ما بيلبس الرجل )
- عباية للنوم او ترنج خفيف
- شبشب جلد او حذاء
- 2 شراب

*****
# رابعا

الاكل
- سندوتشات للمطار فى حالة انتظار الطيارة مده طويلة او للسكة
- مش كميات كبيرة ,, يكفى عمل وجبات ليوم او يومين لان الاكل هناك كتير ( مثلا فراخ بانية وارز بسمتى او لحمة باردة وارز)
- جبن ( رومى وفلمنك نستو ,, كله ربع كيلو) و كام علبة فول ,, بيض مسلوق,, للفطار والعشاء كميات بسيطة
- باكو شاى وكيس بن ونيسكافيه و ينسون ( حسب ما بتشربوا ) سكر
- الفاكهة هناك غالية ( ممكن تاخدى كيلو تفاح و كيلو برتقال )

# تليفونات الاهل
# مواقيت الصلاة ( بكتبها فى الاجندة علشان ما اتاخرش)
# الفلوس ( المصرى ,, الريال ,, الدولار) وفلوس اى حد يديكى فلوس علشان تيجيبى له حاجة
اوعى تصرفى كل الفلوس فى المكان اللى تروحيه الاول ولكن قسمى الفلوس
# المشتريات ( اكتبى فى الاجندة كل ما تشتريه )
# فى الدعاء ان شاء الله ,, ادعى بترتيب الاخوة والابناء والاهل والاقارب والزملاء والجيران علشان ما تنسيش حد
# اعطى الاولوية لقضاء اكبر قدر بالحرمين الشريفين والصلاة والنظر للكعبة وتلاوة القرآن
# خدى شنطة لوضع الشبشب والمصلية بها ( اشترى مصلية اول ما توصلى )
# هناك كل حاجة متوفرة ولو نسيتى حاجة سهل تشتريها
عمرة مقبولة ان شاء الله